Դեսպան Վ.Հարությունյանն այցելել է Տվերի պետական համալսարան

27 հունվարի, 2023

Ռուսաստանի Դաշնությունում Հայաստանի Հանրապետության դեսպան Վաղարշակ Հարությունյանն այցելել է Տվերի պետական համալսարան (ՏՊՀ), որտեղ կլոր սեղանի ձևաչափով հանդիպում է ունեցել բուհի ռեկտորի ժամանակավոր պաշտոնակատար Սերգեյ Սմիրնովի, ֆակուլտետների դեկանների և ՀՀ քաղաքացի ուսանողների հետ։

Հանդիպման ընթացքում քննարկվել են միջբուհական համագործակցության արդի հարցերն ու զարգացման հեռանկարները։ Հանդիպման մասնակիցները ծանոթացել են բուհի բազմամյա պատմության և զարգացման ներկա փուլի մասին պատմող շնորհանդեսին, ինչպես նաև անդրադարձել հայաստանյան բուհերի, մասնավորապես, Երևանի պետական համալսարանի, Հայ-ռուսական (Սլավոնական) համալսարանի, Հայաստանի եվրոպական համալսարանի և Մ.Նալբանդյանի անվ. Շիրակի պետական համալսարանի հետ ՏՊՀ համագործակցությանը։

Դեսպան Վ.Հարությունյանը շնորհակալություն է հայտնել ՏՊՀ ղեկավարությանը հրավերի համար, ընդգծել երկու երկրների բուհերի միջև համագործակցության հետագա զարգացման կարևորությունն ու ուղենշել փոխգործակցության առաջնային ուղղությունները։

Տվերի մարզ այցի շրջանակներում դեսպանը հանդիպել է հայ համայնքի ներկայացուցիչների և Գ.Ժուկովի անվան օդային-տիեզերական պաշտպանության ռազմական ակադեմիայի հայ ունկնդիրների հետ, ինչպես նաև այցելել տեղի հայկական Սուրբ Հարություն եկեղեցի և կից գործող հայկական կիրակնօրյա դպրոց։ Համայնքի ներկայացուցիչների հետ քննարկվել են գործունեության տարբեր ոլորտներում կապերի և փոխգործակցության ընդլայնման հարցերը։ Դեսպանը կարևորել է երկկողմ միջտարածաշրջանային համագործակցությանն ուղղված նախագծերում և նախաձեռնություններում համայնքի ակտիվ մասնակցությունը։ Ակադեմիայի ունկնդիրների հետ զրույցի ընթացքում դեսպանն ընդգծել է Հայաստանի և Ռուսաստանի միջև ռազմական-ռազմավարական համագործակցության զարգացման և ամրապնդման կարևորությունը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր